Diwan berr ha berr
Ur rouedad a 48 skol, 7 skolaj ha 2 lise a ya d'ober ar skolioù Diwan er pemp departamant.
3700 skoliad zo bet degemeret en distro skol 2025 er c'hevread, en o zouez un drederenn en eil derez.
Digoust, laik ha digor d’an holl eo ar c’helenn ; an dra-se zo kaoz ez eo ar strollegezhioù lec’hel keveler ar c'hevread.
Kinniget e vez ur c’helenn dre soubidigezh a laka ar skolidi da vestroniañ kenkoulz ar brezhoneg hag ar galleg ha kement dre gomz ha dre skrid.
Dindan gevrat emañ ar skolioù gant an Deskadurezh Stad. Kemeret e vez e kont eta goproù ar skolaerien. Heuliañ a ra ar skolaerien-mañ programmoù ofisiel gall hag ensellet e vezont evel o c’henseurted eus ar c’helenn publik ha prevez.
Skolioù kevredigezhel eo ar skolioù, skolajoù ha liseoù, meret gant familhoù a-youl vat er c’hevredigezhioù desevel poblek.
Arc’hantet e vez pep skol gant obererezhioù ur c’huzul skoazell pe vuioc’h oc’h aozañ abadennoù sevenadurel, dudius pe sport. Gant an arc’hant dastumet gant ar c’huzulioù skoazell-mañ e c’hell bezañ digoust ar c'helenn.
Hollad frammoù Diwan a verr ouzhpenn 18 milion a euroioù bep bloaz : un drederenn evit ar c'hevread, un drederenn evit skolioù hag un drederenn evit ar skolajoù ha liseoù. Gant tost ouzh 600 den a-vicher e vez kaset da benn ar gefridi kelenn ha treuzkas ar brezhoneg e Diwan : 266 gwazour·ez an Deskadurezh stad, 162 goprad·ez rouedad Diwan (skolaerien·ezed, kasourien·ezed, melestradurezh...) ha 166 goprad·ez er skolioù (ASEM, ober war-dro ar c'hempenn...).
Diwan : ur skol gant ur raktres hag un hentenn a-ziforc’h
- An divyezhegezh gant an hentenn dre soubidigezh
- Yezh pennañ ar c’helenn hag ar vuhez er skolioù eo ar brezhoneg.
- Gant kelenn ar galleg er c’hentañ derez e tizher ul live mat-kenañ e galleg.
- Un heuliad pedagogel eus ar skol-vamm d’ar vachelouriezh.
- Ur c’helenn a gemer e kont gwir sevenadur Breizh a-vremañ.
- Familhoù bodet asambles tro-dro ur raktres desevel hag e emdroadur.
... hag ur skol evel ar re all
- Klasoù kevratet gant an Deskadurezh Stad.
- Kelennerien stummet, titlet, diplomoù heñvel ha re ar c’helenn publik hag ar c’helenn prevez.
- Skolioù ma vez heuliet ar programmoù ofisiel.
- Skolidi ganto ur skoliaterezh heñvel ha hini ar skolidi all. Tremen a reomp an hevelep arnodennoù ha priziadennoù.
